Georgie verras kinders by legacy-sentrum

Met Oktober wat as nasionale vervoermaand sowel as die maand vir bewusmaking van geestesgesondheid verklaar is, was dit onafwendbaar dat GO GEORGE se gelukbringer, Georgie, ‘n draai sou maak by die jongspan met verskillende tipes uitdagings by die Legacy-sentrum in Denneoord.

Georgie het gehoor van Legacy-sentrum se bewusmakingsveldtog, “Kinders met spesiale behoeftes is anders, NIE minderwaardig nie!”, en hul suigstokkieprojek om geld in te samel om bewusmaking van hierdie kinders te skep. Toe hy boonop uitvind dat die Môreson-kinders wat tuisskoling ontvang verlede Vrydag by Legacy sou gaan kuier, was daar geen keer aan hom nie.

Die kinders was hoogs opgewonde toe Georgie om die hoek verskyn en het vrolik saam met hom gedans en “Die wiele van die bus draai om en om” gesing. Georgie het interessante inligting omtrent die busse met die kinders gedeel en was baie bly om te hoor dat ‘n hele paar van hulle gereelde GO GEORGE-passasiers is.

Migael en Georgie

Migael van Deventer (10) is ‘n jong man met sterstatus in GO GEORGE-kringe. Sy ma, Mariza van Deventer, sê daar is min dinge wat ‘n outistiese kind laat glimlag, maar ‘n GO GEORGE-busrit doen presies dit vir hulle seun. Hier hou Migael en Georgie elkeen ‘n handvol groen suigstokkies vas om almal te herinner dat dit te koop is ter ondersteuning van Legacy-sentrum se bewusmakingsveldtog: “Kinders met spesiale behoeftes is anders, NIE minderwaardig nie!”.

Georgie Nommerplaat

Die besoek aan Legacy-sentrum was Georgie se eerste uitstappie met sy windmakerige nuwe nommerplaat: CAW GEORGIE.

Moreson kinders ontmoet Georgie

‘n Klein groepie kinders by die Môreson-kinder- en jeugsorgsentrum vaar beter met tuisskoling as met hoofstroom- of spesiale behoeftes-onderrig. Hulle het ook Vrydag by die maats by Legacy-sentrum gekuier toe Georgie daar inloer. Hulle was baie beïndruk met die kleurvolle, vrolike gelukbringer en het tog te lekker met hom gesels.


Previous Article

Next Article