GO GEORGE beïndruk nasionale vervoerforum

Poseer saam kunswerk

Afgevaardigdes by die nasionale vervoerforum se vergadering in George was hoogs beïndruk met die fasiliteite by die nuwe vervoerkern (hub), maar die element wat die grootste indruk gemaak het, was die unieke kunswerk uit skrootmetaal. Etlike “selfies” is saam met die twee yster-passasiers geneem. Die twee dames wat hier poseer, is van links Wendy Gumede (Delca Systems) en Moshe Ramotshwane (dept. van vervoer).

Die Stad George was verlede week vir die eerste keer die gasheer van ’n nasionale vervoerforum-vergadering (NVF) waartydens 25 afgevaardigdes met Tuinroete-gasvryheid kon kennis maak.

Vrae tyd

Lede van die nasionale vervoerforum het tydens ’n GO GEORGE-uitstappie en besoek aan die vervoerkern (hub), geleentheid gehad om George se direkteur van siviele ingenieursdienste, Harold Basson (tweede van regs) uit te vra oor die infrastruktuur wat nodig is vir ’n stelsel soos GO GEORGE. Heel regs is GO GEORGE-bestuurder, James Robb.

Die NVF is ’n forum wat tot stand gebring is deur die departement van vervoer en bestaan uit vaardige, ervare lede uit die nasionale, provinsiale en plaaslike regering, ondernemings in staatsbesit, vervoeragentskappe en die Suid-Afrikaanse Plaaslike Regering-vereniging (Salga). Die doel van die forum is om alle vlakke van regering by te staan en te lei in die beplanning en implementering van geïntegreerde, volhoubare vervoerprojekte en programme.

Elsie en groep

Die gaste het die GO GEORGE-busrit baie geniet en hul verbasing oor die “groot stad” uitgespreek. Van links is Elsie Neluvhalani en Buyiswa Jako (albei van die dept. van vervoer); tweede ry: Sibulele Dyodo (Salga); derde ry: Sabelo Duma en Ntombi Jantjie (dept. van vervoer) en Wendy Gumede (Delca Systems); heel agter: Moshe Ramotshwane (dept. van vervoer).

Die George-munisipaliteit is deel van die beleid- en strategie-werkstroom van die forum, en het ’n visuele aanbieding oor die agtergrond en ontwikkeling van die GO GEORGE-busdiens gedoen. Die afgevaardigdes is Woensdagaand op ’n busrit deur die dorp geneem en het ook die nuwe George-vervoerkern (hub) besoek waar hulle vrae kon vra oor die stelsel en die vereiste infrastruktuur.


Previous Article

Next Article