Kaartjies

1. Hoeveel kos ‘n kaartjie, en hoe word dit bereken?

’n Enkelkaartjie wat vooraf by verkoopspunte gekoop word, kos tans R10, en ’n kaartjie wat op die bus gekoop word, R12. Hierdie prysverskil is ingestel om passasiers aan te moedig om hul kaartjies te koop voordat hulle op die bus klim. Dit sal tyd bespaar en help om die stelsel op skedule te hou. Multiritkaartjies (geldig vir 10 ritte) kos R90. Die busdiens word op ’n afstandgebaseerde kostestelsel bedryf, en die kaartjieprys is gekoppel aan die minimum loon van ’n huiswerker, soos deur die departement van arbeid bepaal. Die kosteberekening neem die vermoë van ’n stedelike huiswerker (wat teen minimumloon werk) om die koste van openbare vervoer te bekostig, in ag. Hierdie “vermoë” word gebaseer op die nasionale doelstelling dat nie meer as ’n sekere persentasie van ’n individu se maandelikse inkomste aan vervoer spandeer behoort te word nie. Al die roetes wat tot dusver geïmplementeer is, val binne die kortste afstand-band (15 km), sodat alle ritte R10 of R12 sal kos (enkelkaartjies vooraf gekoop en op die bus gekoop), of R9 indien ’n multiritkaartjie gebruik word. Vir ritte langer as 15 km, sal die koste met elke 5 km meer verhoog. Hierdie kaartjiepryse word deur die regering gesubsidieer en is nie die ware koste van vervoer nie. Pryse sal jaarliks aangepas word.

2. Hoe koop ek ‘n kaartjie? Kan ek met my debietkaart betaal?

Op GO GEORGE-busse kan enkelkaartjies slegs met kontant gekoop word. Passasiers word versoek om die presiese bedrag (R12) gereed te hou wanneer hulle kaartjies op die bus wil koop, om die busbestuurder se taak te vergemaklik en tyd te spaar. Multirit- én enkelkaartjies kan by verkoopspunte en mobiele verkopers gekoop word teen ’n laer prys as op die bus (sien punt 1). Indien die verkoopspunt kaartfasiliteite het, sal jy met ’n debietkaart kan betaal. Om op die bus te ry, moet elke passasier sy/haar eie kaartjie hê. ’n Slimkaart-stelsel word vir die toekoms beplan.

3. Kan my kinders saam met my ry op my kaartjie?

Nee, elke passasier het sy/haar eie kaartjie nodig. As jou kind 4 jaar of ouer is, gaan hulle hul eie kaartjie moet hê.

4. Wat is ‘n multiritkaartjie?

Die goedkoper en geriefliker GO GEORGE-multiritkaartjie word by geregistreerde verkoopspunte en mobiele verkopers regoor die dorp verkoop. Hierdie kaartjie kos tans R90 en is geldig vir 10 ritte binne 30 dae van die datum van aktivering, vir een uur nadat die kaartjie geknip is, en binne ’n radius van 15 km. Hierdie is ’n besparing van R1 per rit, vergeleke met die enkelkaartjie wat R10 kos wanneer dit buite die bus gekoop word, en R3 teenoor die koste van die enkelkaartjie wat op die bus gekoop word (R12). Die bykomende gerief van die multiritkaartjie is dat jy net een keer koop vir ’n tydperk, nie kontant hoef saam te dra nie, en dat dit die opklimproses op die bus versnel.

 

NEEM ASSEBLIEF KENNIS: Die GO GEORGE Slimkaart vervang die papierkaartjies van die busdiens op 15 November 2018.

Om alle passasiers genoeg tyd te gee om by ’n kaartverspreidingspunt uit te kom, sal Slimkaarte vanaf 15 Oktober uitgereik word. Besoekers aan die stad, sowel as passasiers wat nie gewoonlik
gebruik maak van die busdiens nie, sal steeds ‘n kaartjie op die bus kan koop met kontant, waarna ’n gedrukte kwitansie wat as kaartjie dien, uitgereik word. Hierdie kaartjies kos egter meer as die
voorafgekoopte ritte wat op die Slimkaart gelaai word en sal van die koper vereis om die regte bedrag geld in kontant gereed te hou. Ons moedig alle passasiers aan om hul Slimkaarte so gou
moontlik te koop.