Kinders leer speel-speel oor openbare vervoer

As deel van GO GEORGE se deurlopende program om opvoedkundige materiaal vir gebruik in skole te ontwikkel, is twee opwindende toevoegings tot die versameling nou bekendgestel.

Die GO GEORGE-legkaart met 120 stukke, gemik op graad 1, 2 en 3 en ’n kleurvolle aktiwiteitsboekie vir graad 4’s is ontwerp om in samehang met die skoolleerplan oor openbare vervoer gebruik te word.

Albei die items word tans uitgedeel aan skole in die gebiede waar die busdiens reeds aktief is, en die legkaart ook aan die munisipale biblioteke vir gebruik in hul opvoedkundige programme.

’n GO GEORGE-bordspeletjie was die eerste item wat vir gebruik in skole ontwerp is en is sedert die bekendstelling daarvan in November 2017 duidelik ’n groot treffer by die jongspan wat al spelende leer.

Die jongspan by Laerskool Kretzenshoop was baie opgewonde oor die vooruitsig van nuwe GO GEORGE-legkaarte om te pak, asook die feit dat ’n soektog na hul gunsteling-gelukbringer Georgie deel van die pret is. Agter staan mnr. Daclon Aries, skoolhoof, en me Mora Titus, departementshoof van die grondslagfase, by, van links, Jane Koester, Elginay Saulse, Tiffany Van Wyk, Chavondre Klaassen en Courtney January, almal in graad 2.

 

By St Paul’s Primêre Skool was die graad 4’s baie verras om elkeen hul eie GO GEORGE-aktiwiteitsboek te ontvang. Porchia Oktober en Keagan Botha het dadelik ’n uitdaging gekies om hul kennis van die busdiens te toets. Juffrou Lauren Nelson (agter) sê die boeke gaan nou ’n welkome deel van haar vervoerlesse vorm.


Previous Article

Next Article