Tot groot vreugde van passasiers en perseeleienaars in die omgewing van GO GEORGE-bushaltes, word daar tans 100 vullisdromme by bushaltes regoor die dorp aangebring.
Die installering van hierdie eerste groep dromme sal voor die einde van die maand voltooi wees. Dit is toegewys aan bushaltes waar daar reeds permanente skuilings opgerig is, asook spesifieke probleemgebiede soos die bushaltes in Markstraat naby die vervoerkern (George Transport Hub), waar dieselfde dromme as duursaam en funksioneel bewys is. Nog ’n groep van 100 dromme sal in die volgende munisipale finansiële jaar aangebring word.
Die bushaltes by die Garden Route Mall waar passasiers dikwels iets eet terwyl hulle vir die bus wag, is ook verlede week met hierdie duidelik sigbare vullisdromme toegerus. Volgens roetereguleerder, Andrew Lesch, maak dit ’n groot verskil aan die algehele netheid van die gebied rondom die bushaltes. Buskaartjies, oorskietkos en koeldrankblikkies is dikwels op die sypaadjie gelaat voordat die vullisdromme aangebring is aangesien geen kos of drinkgoed op die busse toegelaat word nie.
