Georgie, die GO GEORGE-gelukbringer, is met vreugdekrete begroet toe hy op Lentedag ’n draai gaan maak het by George Voorbereidingskool. Sy blombestrooide lente-hoed is egter oorskadu deur die uitbundige skeppings van die leerders, maar hy het dit tog oor sy hart gekry om saam met ’n paar bewonderaars vir ’n foto te poseer. Voor sit Migael Fick en Ava- Rain Norton, en by Georgie staan, van links, Jordan Stevens, Danielle Barnard, Milan de Villiers en Laylah Conway.
Om te deel in die feestelikhede wat met Lentedag gepaard gaan, het die GO GEORGE-gelukbringer Georgie op Vrydag 1 September ’n draai by George Voorbereidingskool gaan maak. Die skool het ’n kompetisie gehou om die indrukwekkendste, tuisgemaakte lentehoed aan te wys, en Georgie het die kans aangegryp om self in ’n blommeskepping by die skool op te daag.
Hoewel Georgie gewoonlik baie gesteld is op sy netjiese GO GEORGE-uniform, het hy eenvoudig “Loslitdag” gepleit en uitgehaak. Om mense met spesiale behoeftes op die busse te akkommodeer, is ’n baie belangrike deel van GO GEORGE se missie en die busdiens ondersteun Loslitdag, die vlagskip-fondsinsamelingsprojek van die Nasionale Raad vir Persone met Gestremdhede, heelhartig.
