GO GEORGE het vroeër vanjaar weggespring met ‘n veldtog om ouetehuise en aftreeoorde in George te besoek om senior inwoners met ‘n snoesige GO GEORGE-kniekombersie of -inkopiesak te bederf, en terselfdertyd die voordele van die busdiens te verduidelik, en hoe om dit te gebruik. Enige organisasie wat belangstel in ‘n inligtingsbesoek van die GO GEORGE-span is welkom om ‘n boodskap by die inbelsentrum te laat, deur 0800 044 044 te skakel.
Slaggereed om die bus te haal vir ‘n lekker inkopietog met hul GO GEORGE-sakke is, van links, Leon Campbell, Kay Schroeder, Joy Baird en Shirley Campbell van die George Service Clubs-aftreeoord. Die inwoners is ingelig oor die busdiens se geskiedenis en toekomsplanne, en hoe hulle die diens kan benut.
Ds Christo Joseph (links) en rdl. Jean Säfers, wyksraadslid vir Wyk 1 (heel regs), het saam uitgedeel aan die kleurvolle GO GEORGE-komberse vir die VGB Blanco se bejaardes. Dié groep het die komberse met oop arms ontvang en gesê dit gaan beslis saam op hul toer later vanjaar.
Die bejaardes by die Rosemoor-dienssentrum vir bejaardes was baie opgewonde oor die nuwe reëling t.o.v. een kaartjie vir een uur se ritte, in enige rigting, wat pas voor die besoek aangekondig is. Hier spog ‘n paar seniors met hul nuwe GO GEORGE-komberse. Voor van links is Christina du Preez (83), Dolly Abrahams (79) en Mieta Claassen (77). Agter, van links, is die administratiewe beampte van die dienssentrum, Pricelia Page, Simphiwe Schaap, GO GEORGE-gemeenskapskakelbeampte, en Chris Erasmus, sentrumbestuurder.
Tydens GO GEORGE se besoek aan die Rosemoor-dienssentrum vir bejaardes het die gemeenskapskakelbeampte, Simphiwe Schaap, ook GO GEORGE-sakgidse uitgedeel. Hier verduidelik hy breedvoerig hoe gerieflik die gids met die stelselkaart en tydroosters is om te gebruik, en hoe dit gelees moet word. Die seniors was hoogs in hul skik met dié handige gids wat in die sak pas.
