Die gebruikersvriendelike en toeganklike GO GEORGE-inligtingskiosk wat in die George-vervoersentrum (Hub) opgerig is, het op Dinsdag 18 April 2017 sy vensters vir die publiek oopgegooi. Hierdie fasiliteit vervang die ou bergingshouer in Cradockstraat, langs die Hub, wat vir hierdie doel gebruik is. Passasiers word genooi om die kiosk te besoek vir enige busverwante inligting en hulp met roetebeplanning. Die kiosk is oop van 08:00 tot 17:00 op weeksdae en van 08:00 tot 13:00 op Saterdae. Die splinternuwe tydrooster-sakgids met die nuutste roosters wat op 7 Mei geïmplementeer word, is ook vanaf Vrydag 21 April by die kiosk te kry. GO GEORGE-gemeenskapskakelbeampte, Tyron Jeyi (links) het ’n opgewonde Gaynore Korunna, die inligtingsbeampte wat die kiosk sal beman, Dinsdagoggend gehelp om haar nuwe kantoor in te rig en gereed te kry vir diens.
