Hoërskool Pacaltsdorp-leerder wen GO GEORGE rap-kompetisie

Wenner van die GO GEORGE Anti-vandalisme Rap-kompetisie, Olwethu Sayidini.

Olwethu Sayidini, ’n leerder van Hoërskool Pacaltsdorp, is onder luide en vreugdevolle applous aangekondig as die algehele wenner van die GO GEORGE Anti-vandalisme Rap-kompetisie vir hoërskole wat op Woensdag 10 Augustus 2022 in die George Kunsteteater gehou is. Sy treffende koorlirieke sal nog lank bly draai in die gehoor se geheue: “Please stop the vandalism, it is not a pranksterism, you don’t want to end up in prison!”

Die naaswenners is albei van Hoërskool George: Graziel Heathcote (tweede plek) en Likho Ntshohgontshi (derde plek). Die drie wenners is gekies uit 10 finaliste wat deur agt hoërskole in George ingeskryf is.

Die kompetisie het deel gevorm van ‘n gefokusde veldtog deur GO GEORGE om aandag te vestig op die kommerwekkende sosiale kwessie van vandalisme, en spesifiek die vandalisering van GO GEORGE-infrastruktuur (busse en skuilings) wat teen hoë koste tot voordeel van die gemeenskap verskaf word.

Deelnemers moes voldoen aan spesifieke kriteria soos die gebruik van die woorde GO GEORGE en vandalisme, benewens die vereiste dat die inhoud op geen manier aanstootlik moet wees nie en geskik moet wees vir verspreiding. Die oorspronklike lirieke waarmee die deelnemers vorendag gekom het, was inspirerend en kragtig en het verwys na die negatiewe invloed van vandalisme op hul gemeenskappe en die busdiens, asook die gevolge vir die oortreder. Die boodskappe sal versterk word deur die media te gebruik waarop die jeug reageer, soos Facebook, TikTok en Instagram.

George se uitvoerende burgemeester, raadsheer Leon van Wyk, het die pryse aan die drie wenners oorhandig. Hy het die belangrikheid daarvan om vandalisme te voorkom, beklemtoon. “Ons is deeglik bewus daarvan dat GO GEORGE en die munisipaliteit se anti-vandalisme-dryfkrag gebore is uit die noodsaaklikheid om ‘n einde te maak aan die plaag van vandalisme in ons dorp en in ons gemeenskappe,” het hy gesê. “Vandalisme is nie ‘n poets of ‘n speletjie nie; dit is ‘n kriminele oortreding wat blywende gevolge vir die oortreders kan hê. Ek is werklik bemoedig deur wat ek vanaand gesien en gehoor het – vandalisme moet ten alle koste ontmoedig word. Ek glo hierdie kompetisie verteenwoordig ‘n baie relevante en kragtige vorm van uitdrukking wat deur ons jeug gebruik word en wat die mag het om hul portuurgroep te beïnvloed.”

Die wenner van die kompetisie het Beats Solo3 draadlose oorfone ontvang, die tweede pryswenner ‘n stel Skullcandy draadlose oorfone, en die wenner van die derde prys is huis toe met ‘n JBL flip 5 Bluetooth-luidspreker. Elke finalis het ‘n geskenksak met koopbewyse of produkte van verskeie borge ontvang, waaronder Margot Swiss, Watsons Vleis, Coca-Cola, Root Café, Nando’s, RocoMamas, Spur en Panarotti’s.

Eerste naaswenner van die GO GEORGE Anti-vandalisme Rap-kompetisie, Graziel Heathcote.

 

Tweede naaswenner van die GO GEORGE Anti-vandalisme Rap-kompetisie, Likho Ntshohgontshi.

 

George se uitvoerende burgemeester, raadsheer Leon van Wyk, het die pryse aan die drie talentvolle wenners van die rap-kompetisie oorhandig. Saam met hom op die verhoog is, van links, Olwethu Sayidini (wenner), tweede naaswenner Likho Ntshohgontshi, en eerste naaswenner Graziel Heathcote.

 

Drie van die vier kompetisiebeoordelaars is bekende vermaaklikheidskunstenaars: van links, Yoma, Moses Williams en Jason Hakkiesdraad Hartman.

 

Robyn Mouton (regs) is ‘n plaaslike jongman wat siggestremd is, baie lief is vir rap-musiek en met ‘n fyn ingestelde oor luister. Hy was deel van die paneel beoordelaars, hier bygestaan deur sy pa, Alberto Mouton.

 

Die rap-kompetisiefinaliste wat hul wysheid en talent met ‘n waarderende gehoor gedeel het, was van links, voor: Jade van Harte (Eden Tegniese Hoërskool), Jamil Pretorius (Hoërskool Outeniqua), Franwill Frazenberg (Van Kervel-skool), Kirstan Keffers (Hoërskool Parkdene) en Liyema Nsasane (Hoërskool George); van links, agter: Jerome Appels (Olympia-skool), Baynalekhem Misland (Hoërskool Outeniqua), Liko Ntshohgontshi (Hoërskool George), Graziel Heathcote (Hoërskool George), Jerico Manies (Olympia-skool) en Olwetho Sayidine (Hoërskool Pacaltsdorp).

 

Saam met die drie wenners ná die finale kompetisiegeleentheid was George se uitvoerende burgemeester, raadsheer Leon van Wyk (middel, agter), rdl. Gert Niehaus, voorsitter van die Artikel 79-komitee van die George-raad (tweede van regs), en James Robb, waarnemende toesigbeampte van openbare vervoer van die munisipaliteit (tweede van links), asook drie van GO GEORGE se ses anti-vandalisme-ambassadeurs: Moses Williams, akteur en komediant (heel links), Lizette da Silva, George Herald-redakteur (middel), en agter haar, Morné Pietersen, stasiebestuurder, Eden FM. Drie van die ambassadeurs, Peter Jaftha, Lloyd Bosman en Zane Kirchner, kon nie die geleentheid bywoon nie, maar het hul beste wense aan die finaliste en wenners gestuur. Olwethu Sayidini (wenner) en tweede naaswenner Likho Ntshohgontshi staan langs James Robb, met die eerste naaswenner Graziel Heathcote heel regs.


Previous Article