GO GEORGE-personeel geniet dit altyd om omgee en deernis te toon deur van hul persoonlike tyd aan die gemeenskap te gee op Mandela-dag.
Vanjaar, soos in 2020 ook die geval was, het Covid-19-inperkings en -veiligheidsmaatreëls die maniere waarop mense kan uitreik om ‘n verskil te maak, beperk. Daar is egter altyd ‘n plan te make om ‘n boodskap van omgee te stuur aan diegene in nood, en om die organisasies en vrywilligers wat toegewy is aan die verbetering van hul lewens te ondersteun.
Ruim skenkings van die GO GEORGE-personeel in hul persoonlike hoedanigheid het dit moontlik gemaak om onder meer 20 sorgpakkies aan die Phambili-toevlugsoord vir vroue en kinders te oorhandig, asook brood- en sopbestanddele aan CREMHOG, ‘n organisasie wat kos aan die haweloses verskaf. ‘n Paar personeellede het ook besluit om bloed te skenk.
James Robb, GO GEORGE-bestuurder, het die verbintenis van die busdiens en alle belanghebbendes tot die opheffing van die George-gemeenskap uitgespreek. “Ons personeel se persoonlike bydraes tot die Mandela-dag-inisiatief is maar ‘n klein gebaar van verbintenis tot die bou van die omgee-samelewing wat Madiba gevisualiseer en nagestreef het,” het hy gesê.
