’n Gewilde TV-karakter wat nou nog deur bewonderaars van The A-Team aangehaal word, sou na ’n onlangse “reddingsoperasie” by die George-vervoerkern (Hub) opgemerk het: “I just love it when a plan comes together”.
Dit is passasiersdienspersoneel by GO GEORGE se werk om oplettend en sensitief te wees vir passasiers se behoeftes. Alle passasiersdiensbeamptes wat op die busse en by bushaltes werk, die inligtingsbeampte in die Hub en die agente in die inbelsentrum het daarom noodhulpopleiding ook ontvang. Die eerste persoon wat die nood van ’n siek passasier in die Hub onlangs opgemerk het, was egter nie ’n personeellid nie, maar die skoonmaker, Zoliswa Matiya. Die passasier verkies om anoniem te bly.
” Zoliswa het my by die inligtingskiosk kom roep om te kom help met ’n passasier wat in die Hub gesit en baie siek gelyk het,” sê Meloney Frans, die GO GEORGE-inligtingsbeampte. “Ek het die vrou water gegee om ontwatering te voorkom, want sy was baie naar en het herhaaldelik opgebring. Toe dit duidelik word dat sy nie beter word nie, het ek ons inbelsentrum gevra om die ambulansdiens te ontbied.”
Intussen het een van die passasiersdiensbeamptes, Althea Slater, by die Hub aangekom en by Meloney oorgeneem. “Ek het haar bly water gee, maar het regtig baie bekommerd geraak oor die vrou en na ’n ruk weer die ambulansdiens gebel. Na nóg ’n uur het ek ons opsiener gebel en toestemming gevra om die passasier hospitaal toe te neem op ons bus wat in daardie rigting ry.”
Althea en kollega Rosey Hoeds het die siek passasier tot in Ongevalle vergesel, die papierwerk help afhandel en seker gemaak dat sy gemaklik is.
“Ons het besef haar familie mag bekommerd raak as sy nie terugkom huis toe nie en het aangebied om hulle te bel voordat ons gaan. Ongelukkig kon sy ons nie ’n kontaknommer gee nie, maar net ’n adres,” sê Althea. “Ons het eers oorweeg om die volgende geskeduleerde bus na daardie area te neem en die huis te gaan soek, maar toe besluit dat dit vinniger sal gaan as ons die polisie se noodnommer, 112, skakel. Die polisie was baie behulpsaam en het dadelik na die passasier se mense toe gery om hulle in te lig oor die situasie. Hulle het haar blykbaar later die aand by die hospitaal gaan haal.”
GO GEORGE-bestuurder, James Robb, het die deelnemers aan die “klein drama” wat vir ’n passasier in nood troos gebring het, bedank. “Dit is ons strewe om dit ’n aangename ervaring vir almal te maak om die busdiens te gebruik,” sê hy. “Dit maak ons harte warm om ’n spanpoging en inisiatief soos hierdie te sien – ons personeel se opregte omgee en die
aanbod om die ekstra myl te loop.”
Die passasier het haar opregte dank en waardering vir die span se ondersteuning uitgespreek.