GO GEORGE het aangekondig dat die busdiens na Thembalethu in drie fases geaktiveer sal word met die eerste wiele wat binnekort in Nelson Mandela Boulevard af sal rol. Die ander twee fases sal kort daarna volg.
Die George-raad het aanvaar dat dit nie moontlik was om die aanvanklike sperdatum in November te haal nie, maar het besluit dat die diens so gou moontlik moet uitrol met ‘n verdere aankondiging wat minstens een week voor die aktivering van die roetes gemaak moet word. Die huidige voorbereidings word alles gesien as deel van die uitrol van die diens.
Drie fases van uitrol
Fase 1:
Roete 11 Thembalethu – GR Mall
Roete 18A Thembalethu – Blanco
Roete 18B Fourways – Blanco
Roete 57A Jonga Community
Roete 57B Ramaphosa Community
Roete 57C Tabata Community
Fase 2:
Roete 10 Thembalethu – George Industria
Roete 57D Fourways Community
Fase 3:
Roete 4A Thembalethu – CBD
Roete 4A Express Thembalethu – CBD
Roete 4B Fourways – CBD
Roete 57E Ngcakani Community
Roete 62A Jonga – Hospitaal
Roete 62B Ramaphosa – Hospitaal
Roete 62C Tabata – Hospitaal
Inligting oor die Thembalethu-diens
Die eerste fase van die Thembalethu-inligtingsveldtog het gefokus op besoeke aan besighede in die dorp wat inwoners van Thembalethu in diens het, gevolg deur ‘n drie-weke lange veldtog by die Thembalethu-kliniek en -biblioteek, en skakeling met personeel by skole en opvoedkundige instellings. Tot op hede het hierdie aktiwiteite gelei tot een-tot-een skakeling met 7 748 individue.
Op 7 Februarie het die passasiersdiensbeamptes (champions) begin met deur-tot-deur skakeling met inwoners by hul huise, wat tot op hede 1 972 huise en ongeveer 7 888 lede van huishoudings gedek het. Inligtingsblaaie wat roetekaarte van die ingefaseerde uitrol bevat, word uitgedeel en aan voornemende passasiers verduidelik. Die eenparige reaksie op die nuus dat die busse beslis nog kom, is dié van opgewondenheid, verligting en dankbaarheid.
Algehele gereedheid
Infrastruktuur soos bushaltes, tydelike skuilings en operasionele fasiliteite is op skedule en is meestal voltooi. Inwoners behoort binnekort busse deur die gebied te sien ry vir die toetsing van skedules en roetes.
Enigiemand wat ‘n inligtingsbesoek aan hul personeel of organisasie wil versoek, kan die GO GEORGE-inbelsentrum skakel by 0800 044 044 van 05:00 tot 20:00, sewe dae per week.
