Die GO GEORGE-gelukbringer se eerste week van amptelike pligte is agter die rug en fotoverslae toon dat die vriendelike kêrel vriende gemaak het so ver hy beweeg het, en almal se nuutste keuse vir ‘n selfie is. Jonk en oud het in ʼn ry gestaan om hom te ontmoet en het sy spitsvondigheid en vrolike persoonlikheid geniet. Hy het verskeie biblioteke waar kinders besig was met vakansieprogramme besoek, en het hulle aangemoedig om nooit op te hou lees nie. Hier poseer ‘n groepie bewonderaars saam met hom by die George-biblioteek. GO GEORGE nooi die publiek om deel te neem aan ‘n kompetisie om die gelukbringer ‘n naam te gee. Pos jou voorstel op hul Facebook-blad, of skakel 0800 044 044 om jou keuse in te skryf, voor 5 Augustus 2016.
Die GO GEORGE-gelukbringer was ‘n groot treffer by Saterdag se Madibaz 2016-wedloop waar hy ‘n hele paar van George se Baie Belangrike Persone ontmoet het, en dié was maar te gewillig om saam met die nuutste glanspersoonlikheid in die dorp afgeneem te word. Hier is hy saam met Raadslid Rassie de Villiers, George se eie Olimpiese atleet, Anél Oosthuizen, burgemeester Charles Standers en Moses Gericke, president van die SWD-atletiekunie.
