GO GEORGE logo
Customer care hotline
[wpavefrsz-resizer]

Groep vriende toets GO GEORGE-toeganklikheid vir mense wat blind is

Reginald Smal het die loopvlak baie gerieflik gevind toe hy op die bus klim.

‘n Baie vriendelike groep “assessors” het verlede week die straat ingevaar in George, en ook ‘n busrit onderneem. Die doel van hul besoek was om fasiliteite te toets en terugvoer te gee oor die universele toeganklikheid van die nuut opgegradeerde Markstraat, asook die funksies en dienste om mense wat blind is op die GO GEORGE-busse en by die bushaltes te akkommodeer.

Die vier blinde vriende het van Hartenbos na George gekom waar Diane du Plessis (eienaar van gidshond Akari) en Amanda Bester (eienaar van gidshond Odie) woon, en Corrie Brits (eienaar van gidshond Melvin) en Reginald Smal onderskeidelik van Bellville en Roodepoort by hulle kom kuier het. Die groep het beslis gelyk of hulle op ‘n missie is met drie gidshonde wat die span lei, en Reginald wat ‘n wit kierie gebruik om rond te beweeg.

Universele toegang ‘n topprioriteit

Universele toeganklikheid (UT) is een van die topprioriteite van die GO GEORGE-busdiens wat al voorheen lof ontvang het vir hul progressiewe en innoverende benadering ten opsigte van die akkommodering van passasiers met gestremdhede of spesiale behoeftes.

“Natuurlik het ons in die verlede foute gemaak, maar ons hou aan leer en ons probeer voortdurend om ons dienste aan alle passasiers te verbeter,” het James Robb, waarnemende oorsigbeampte van openbare vervoer van die George-munisipaliteit, gesê.

Vir hierdie doel is die dienste van een van die min gekwalifiseerde UT-konsultante in Suid-Afrika, Colette Fransolet, verkry om die verskillende afdelings van die busdiens deurlopend op te voed, te ondersteun en te assesseer om die ervaring van persone met gestremdhede of spesiale behoeftes te verbeter. Colette het die groep na George genooi en hulle saam met lede van die GO GEORGE-kommunikasiespan vergesel.

Besoekers diep beïndruk

Die besoekers was eenparig beïndruk met die breë sypaadjies in Markstraat en die tasbare plaveisel wat hulle met hul voete kon voel en wat maklik gevolg kan word na die bushalte of vir waarskuwings by voetoorgange. Markstraat is in die finale fases van opgradering, wat verskeie universele ontwerpbeginsels insluit.

Corrie het dit geniet om die loopvlak te gebruik om op die bus te klim en het opgemerk dat die stappie met hul gidshonde deur die Garden Route Mall baie goed afgeloop het. Tot hul vreugde is ‘n Braille-spyskaart by die Wimpy-restaurant aangebied.

Amanda het genoem dat die piepgeluid by die verkeersligte dalk ‘n bietjie harder gemaak kan word, aangesien dit moeilik is om dit bo die enjingeraas van verbygaande busse of vragmotors te hoor. “Alles omtrent die besoek was positief,” het sy gesê, “maar die GO GEORGE-bus was die uiteindelike ervaring van die dag! Die busse is so goed toegerus om mense met verskillende soorte gestremdhede te akkommodeer – dit sal wonderlik wees as elke stad hierdie soort busdiens kan hê. Dit laat die blinde persoon soveel onafhanklikheid toe, met toegang tot hierdie soort vervoer, om self winkelsentrum toe te kan gaan.”

Reginald het ook melding gemaak van die gemak waarmee ‘n persoon wat blind is die ruim sypaadjies met tasbare plaveisel kan navigeer, asook die rigtingaanwysende plaveisel by die bushalte self. “Ek het net lof vir die moeite wat hier in George gedoen word,” het hy gesê.

Dit was Diane se eerste busrit en sy het dit baie geniet saam met haar gidshond, Akari, wat dit ook baie goed hanteer het.

Status van gidshonde

Medepassasiers op hierdie spesifieke bus was nog ‘n bietjie versigtig vir die drie honde in die bus.

“Ek weet die GO GEORGE-kommunikasiespan het baie gedoen om bewustheid oor gidshonde te skep, maar dit is iets wat ons moet aanhou aanspreek,” het Colette gesê. “Die publiek moet bewus gemaak word van die behoefte aan en status van werkende honde en dat hulle skadeloos is. Hulle kan van ander honde onderskei word deur die harnasse wat hulle dra en ‘n teken wat lees: Working guide dog. Please do not distract. Gidshonde is ‘n integrale deel van blindwees as jy ‘n hond besit. Die honde is ‘n verlengstuk van die persoon en gee hulle ‘n groot gevoel van onafhanklikheid.”

Persone met gestremdhede word aangemoedig om van die GO GEORGE-busdiens gebruik te maak en sal, indien nodig, deur passasiersondersteuningspersoneel bygestaan word totdat hulle selfversekerd genoeg voel om alleen te reis. Skakel gerus die GO GEORGE-inbelsentrum by 0800 044 044 vir meer inligting of om ondersteuning te versoek.

Diane du Plessis met haar gidshond, Akari, toets die loopvlak om die bus te betree. Dit was hulle eerste busrit ooit.
Corrie Bester se gidshond, Melvin, woon en werk al ses jaar saam met sy eienaar. Hy was baie kalm op die bus, wat tipiese gedrag vir Labradors is.
Odi (links, met haar eienaar, Amanda Bester) en Akari (Diane du Plessis se gidshond) is suster en broer uit dieselfde werpsel en speel baie lekker saam wanneer hul eienaars kuier. Die twee se derde verjaarsdag verlede week is deeglik gevier en het selfs koerantopskrifte gehaal.
Die besoekers was gefassineerd om te hoor van die fyn besonderhede en beplanning wat betrokke is by die universele ontwerp van die fasiliteite en kenmerke van die GO GEORGE-busdiens – alles om te verseker dat alle passasiers die busdiens met gemak kan gebruik.
Die groep besoekers met hul gidshonde wag geduldig by die bushalte vir hul rit na die Garden Route Mall. Elke oomblik is gebruik om interessante inligting te deel oor universele-ontwerpbeginsels wat daarop gemik is om passasiers met gestremdhede en spesiale behoeftes te akkommodeer.

Latest News