Etlike lede van die junior stadsraad van George sal Vrouedag 2017 onthou as die dag van hul eerste GO GEORGE-busrit. Die jongklomp het ’n gemeenskapsprojek vir dié spesiale dag wat die vroue van Suid-Afrika salueer, beplan, en besluit om op ’n bus te hop na die Rosemoor-dienssentrum vir bejaardes. Hier het hulle die dames met ’n liedjie en ’n dans vermaak en daarna op koffie, tee en kolwyntjies trakteer.
Die junior raadslede was baie beïndruk met die George-vervoerkern (Hub) in die middedorp, en natuurlik ook, soos die meeste besoekers wat vir die eerste keer daar kom, die indrukwekkende passasiers-standbeeld uit skrootmetaal waar altyd foto’s geneem word. Tyron Jeyi, GO GEORGE se gemeenskapskakelbeampte, het gedurende die rit interessante inligting oor die busdiens met die raadslede gedeel en het hul vrae baie geniet. Een jong dame wou weet of daar al enige babas op ’n GO GEORGE-bus gebore is. Ongelukkig moes Tyron erken dat daar nog nie sulke opwindende voorvalle op die busse afgespeel het nie.
