Kleingoed word bus-slim

Eden Pre-primêr busrit

In George word daar deesdae ’n nuwe geslag bus-slim kinders grootgemaak. Etlike kleuterskole, bewaarskole en preprimêre klasse het GO GEORGE reeds deel gemaak van hul leerplan oor vervoer en neem dan die kleingoed vir ’n busrit om die kennis ook prakties te ervaar.

GO GEORGE staan reg met personeel wat onderwysers help met die beplanning en reëlings vir hierdie uitstappies om by die vaste busskedule in te pas, en die kinders so naby moontlik aan hul skole op ’n bus te laat klim. ’n Personeellid of twee sal altyd saam met die groep ry, interessante inligting oor die busstelsel verskaf en enige vrae beantwoord. Die interessante tipe vraag wat opduik tydens so ’n rit, is of die kameras in die busse sien as ’n mens in jou neus krap?
Belangstellendes wat hulp benodig met die beplanning van sulke uitstappies is welkom om die GO GEORGE-inbelsentrum by 0800 044 044 te skakel, of ’n e-pos te stuur aan info@gogeorge.org.za.

Eden Pre-primêr busrit opvoeding groot groep

Die spannetjie van Eden Pre-primêre Skool was erg opgewonde en gereed vir hul busrit na die Garden Route Mall verlede week. Elke kind het ’n nekband met ’n spesiale kaartjie waarop “Ek was op die GO GEORGE-bus” staan, asook ’n GO GEORGE-toerygrugsakkie ontvang.

Eden Preprimêr busrit opvoeding

Simphiwe Schaap, GO GEORGE se gemeenskapskakelbeampte, verduidelik aan die kleingoed van Eden Pre-primêr wat die inligting op die bushalteteken beteken.


Previous Article

Next Article