Ten minste 66 opkomende kontrakteurs en 330 arbeiders, almal inwoners van George en voorheen werkloos, is die afgelope paar maande deur die George-munisipaliteit ingespan vir die opgradering van sypaadjies langs bestaande busroetes. Altesaam 6,71 kilometer veilige, toeganklike voetgangerpaadjies is met dié projek geskep.
Buiten dat die sypaadjies gerieflike loopvlak bied vir GO GEORGE-passasiers om by bushaltes uit te kom, dra dit ook by tot die nasionale departement van vervoer se doelstelling om nie-gemotoriseerde vervoer te bevorder.
Volgens munisipale bestuurder, Trevor Botha, is die sypaadjies ’n welkome opgradering van die paaie-infrastruktuur in George. “Dit dra by tot die verbetering van ons stad. Die fondse wat spandeer is op die bou van die sypaadjies het broodnodige werksgeleenthede geskep, en terselfdertyd veilige loopvlakke vir voetgangers gevestig,” sê hy.
Die inwoners van Syferfontein is baie in hul skik met die netjiese sypaadjie wat nou in Olympicstraat gebou is en ’n stappie of fietsrit na hul woongebied veilig en gerieflik maak. Die foto’s toon die straat voor en na die konstruksie.
