Die 2021-skooljaar het uiteindelik begin met alle leerders wat verlede week teruggekeer het skool toe. Met die meeste skole wat bywoning roteer, was die gewone toename in buspassasiers nie vanjaar so merkbaar nie, maar GO GEORGE was gereed om die jong passasiers weer aan boord te verwelkom, met die fokus op roetebeplanning vir die nuwe pendelaars, en Covid-veiligheid vir almal.
GO GEORGE-passasiersdiensbeamptes is by alle bushaltes naby skole geplaas om skool-spesifieke roetekaarte uit te deel en toe te lig. Die nuwe GO GEORGE-superheld, The Sanitiser, het vir baie pret gesorg met sy ontsmetting van die leerders se hande met sy speelgoed-waterpistool terwyl die belangrikheid van handreiniging versterk is deur sakgrootte botteltjies met handreiniger uit te deel.
Enige individue, skole of sakeondernemings wat meer inligting oor die gebruik van die busdiens benodig, is welkom om die GO GEORGE-inbelsentrum by 0800 044 044 te skakel vir hulp, of om ‘n besoek van die kommunikasiespan aan te vra.
