GO GEORGE sluit Vervoermaand-program by Bethesda af

Vervoermaand by Bethesda

Die jongklomp by die Bethesda Kinder- en Jeugsorgsentrum het Georgie se besoek terdeë geniet en geesdriftig deelgeneem aan sy vrolike Jerusalema-dans. Elkeen het ‘n GO GEORGE-toerygsakkie en sonskermpet ontvang.

GO GEORGE se geteikende bewusmakingsprogram oor openbare vervoersake fokus jaarliks op beide passasiers en die publiek gedurende Openbare Vervoermaand in Oktober. Vanjaar se opvoedkundige program is verlede week op ‘n hoë noot afgesluit met ‘n besoek aan die Bethesda Kinder- en Jeugsorgsentrum in George.

Onder streng nakoming van Covid-veiligheidsmaatreëls het die jongspan by Bethesda die geleentheid gehad om die gewilde GO GEORGE-gelukbringer, Georgie, van nader te beskou terwyl hy op ‘n prettige manier inligting gedeel het oor die veilige gebruik van die busdiens. Hierdie onderwerp het perfek ingeskakel by ‘n program oor hoe om onafhanklik te leef wat Bethesda tans vir hul jong inwoners aanbied.

Georgie het spesifiek gepraat oor die Covid-veiligheidsmaatreëls wat alle GO GEORGE-passasiers moet nakom, soos die behoorlike dra van maskers, handreiniging, hoe om veilig op die bus te klim, die reëls van vervoer en gedrag wat van passasiers verwag word terwyl hulle op die bus is, en veral hoe om die straat in die omgewing van die bus veilig oor te steek.

Die besoek is afgesluit met Georgie se lewenslustige aanbieding van die Jerusalema-dans waaraan die jongmense geesdriftig deelgeneem het.

Passasiersveiligheid bly prioriteit

Hoewel daar ‘n verhoogde fokus op passasiersopvoeding en -ervaring gedurende Nasionale Vervoermaand was, kan die tema van passasiersveiligheid nie genoeg beklemtoon word nie, sê GO GEORGE-bestuurder, James Robb.

“Die Covid-19-veiligheidsbeperkings het vanjaar die gewone ronde opvoedkundige besoeke aan kleuterskole uitgeskakel en om die voorskoolse groepe en laerskoolklasse op busritte te neem, was ook ‘n risiko. Ons sien daarna uit om die leerders weer bloot te stel aan ons plaaslike busdiens en openbare vervoer as ‘n konsep sodra die risikovlak dit moontlik maak,” sê Robb.

‘n Deurlopende passasiersveiligheidsprogram in samewerking met verskeie belanghebbendes is gedurende Vervoermaand van stapel gestuur. As deel van ‘n stel opvoedkundige hulpmiddels is ‘n pamflet ontwikkel wat op passasiersveiligheid fokus terwyl jy na die bushalte loop, op die bus klim, ry en weer afklim, om goeie gewoontes onder passasiers, voetgangers en ander padgebruikers in te skerp.

Enige instelling wat daarin belangstel om by GO GEORGE se veiligheidsprogram ingesluit te word, word uitgenooi om ‘n e-pos aan info@gogeorge.org.za te stuur of 0800 044 044 te skakel.


Previous Article

Next Article