GO GEORGE-wiele rol uiteindelik na Fase 4B-area

4B eerste passasier

4B eerste passasier: Die heel eerste passasier op die nuwe roetes! Magdalena Crowley het Sondagoggend eers naby haar huis op die gemeenskapsroete geklim en daarna oorgeklim op roete 15 Parkdene – CBD om by die werk te kom. Saam met haar is die busbestuurder van die eerste bus, Stuurman Williams.

Die GO GEORGE-busdiens het op Sondag 22 Maart 2020 uitgebrei na Parkdene, Ballotsview, Conville, Borcherds en Lawaaikamp met drie bykomende hoofroetes en een gemeenskapsroete wat hierdie gebiede met mekaar en die res van die dorp verbind.

Inwoners het die busse met groot afwagting genader om die nuwe roetes te toets. Die meeste ritte op die eerste dag is werk toe en kerk toe onderneem aangesien nie-noodsaaklike ritte tans ontmoedig word in die lig van die Covid-19-viruspandemie. Die driedaagse promosie van gratis ritte vir Slimkaarthouers om die mylpaal te vier, is ook uitgestel om onnodige ritte te bekamp.
Volgens James Robb, GO GEORGE-bestuurder, hou die projekspan hul oor op die grond vir terugvoer uit die gemeenskap om onmiddellik aanpassings te maak waar nodig.

 

4B Beverley

Lancy Afrika (links) en Beverley Finnies van Parkdene werk by die Wimpy in die Yorkstraat-sentrum. Beverley sê daar is ’n bushalte reg voor haar huis, “so ek klim daar op en weer af. Dis so gerieflik – dankie GO GEORGE!” Hulle klim oor op roete 18 Blanco wat gerieflik langs die sentrum stop.

 

“Wanneer ‘n informele metode van openbare vervoer met ‘n meer formele, geskeduleerde openbare vervoerstelsel vervang word, bied dit eiesoortige uitdagings in elke gemeenskap gedurende die eerste paar dae, en soms selfs weke. Op grond van inwoners se gebruikspatrone word daar soms roete- en tydroosterveranderings aangebring om ons passasiers se behoeftes aan te spreek. Soos mense die stelsel meer gereeld gebruik, verander hul gebruiks- en aanvraagpatrone. Ons neem dit in ag en streef daarna om, waar moontlik, verbeterings aan te bring totdat hierdie patrone stabiliseer. Spitstye, dit is tussen 05:30 en 08:30, en 15:30 en 18:30, word ook in ag geneem.

“GO GEORGE bedank die gemeenskap vir hul begrip, geduld en voortgesette entoesiasme terwyl ons die kwessies wat ’n vroeër uitrol verhoed het, moes hanteer. Ons is geëerd en bevoorreg om uiteindelik die gemeenskap te kan dien,” sê Robb.

Meer inligting kan verkry word deur die GO GEORGE-inbelsentrum (0800 044 044) te kontak, die roetes hier te sien of  die Facebook of Twitter bladsye te besoek.

 

4B Pote en sy mense

Sinovia Pullen (tweede van links) en Louwna Olieslager werk albei by die Lyttelton-versorgingsoord en is dankbaar vir die gerief en veiligheid wat GO GEORGE hul bied. Hulle eggenote, Shaun Pullen (heel regs) en Shammion Olieslager (links) saam met Pote die hond, het hulle tot by die Parkdene High-bushalte vergesel. Shaun werk by die Garden Route Mall en sal voortaan met die direkte roete vanaf Parkdene werk toe ry.


Previous Article

Next Article